ILOILO CITY- Pasado na sa Iloilo City Council ang resolusyon nga nagahingyo kay Mayor Jerry Treñas nga ipaidalom sa preventive suspension si Punong Barangay Ronela Domopoy Juaneza kag Brgy. Treasurer na si Janette Gacuma sang Barangay San Isidro, Jaro, Iloilo City.
Ini matapos ang ginpatigayon nga imbestigasyon sang Committee on Blue Ribbon sa nangin reklamo ni Barangay Kagawad Eugenio Bolivar tuhoy sa ginaalegar misconduct, abuse of authority, kag paglapas sa Anti-graft and Corrupt Practices Act nga nakumiter ni Juaneza.
Sa interview sang Bombo Radyo kay Councilor Rex Marcus Sarabia, chairman Committee on Personnel, Good Government, Public Accountability and Oversight iya ginpahayag nga natukiban ang kwestyonable nga pagpagwa sang masobra ₱800,000 nga kwarta nga wala nagsunod sa insakto nga proseso.
Suno kay Sarabia, nagpatigayon si Juaneza sang shopping sa pag-procure sang bugas kag mga bulong paagi sa pagtunga sang pondo agud indi ini maglapas sa tig-P50,000 paa sa kada transaction.
Pahayag ni Sarabia, base sa iya committee report, maathag nga ginlapas ni Juaneza ang splitting sang budget nga ginadumili sang layi.
Tatlo ka counts sang paglapas sang Republic Act 9184 ukon “Government Procurement Reform Act” ang ipasaka kay Juaneza.
Pahayag ni Sarabia, ang pag-suspend sang 60 ka adlaw kay Juaneza ang may intensiyon agud nga sini ma-tamper ang mga dokumento sa iya opisina samtang padayon ang imbestigasyon sa kaso.
Dugang ni Sarabia, wala naman ginpanginwala ni Juaneza nga wala nakapaidalum sa bidding ang pila ka items nga ginareklamo.
Gindismiss naman ang kaso batok sa anay Treasurer nga si Janette Gacuma bangud nagresign na ini sa pwesto.
