ILOILO CITY – Gin-aprobahan sang konseho ang resolution nga nagaduso sa tanan nga residente sang syudad sang Iloilo nga magsuksok sang facemask sa tion nga magguwa sa balay ukon opisina.
Ang nasambit nga resolution ang ginduso ni Iloilo City Councilor Jay Treñas kadungan sang session kaina sang aga.
Sa interview sang Bombo Radyo kay Treñas, iya ginpahayag nga antes pa man niya ginduso ang nasambit nga resolution, naka-istoryahanay sila ni Mayor Jerry Treñas tuhoy sa ginapatuman nga Enhanced Community Quarantine.
Suno kay Treñas, apisar nga ginapatuman ang Enhanced Community Quarantine, madamo sa gihapon ang nagalapas sa curfew kag madamo man ang wala nagasuksok sang facemask.
Agud nga indi na madugangan ang kaso sang COVID-19, nagakadapat suno sa Konsehal nga istrikto ang pagpatuman sang pagsuksok sang facemask agud nga indi gilayon maglaton ang virus.
Kadungan sang session, gin-aprobahan man sang konseho ang paghatag sang otoridad sa alkalde nga mag-hire sang dugang nga 46 ka nurse kag 23 ka doktor.
Ang kada isa ang magabaton sang P900 per day sa sulod sang 77 ka adlaw umpisa Marso 16 tubtub Mayo 31.
Naglab-ot sa masobra sa P9 Million ang gin-aprobahan nga surplus fund para sa sweldo sang dugang nga medical frontliners.
