ILOILO – Ginahingyo sang Sangguniang Panlalawigan sa duha ka higante nga telecommunication companies nga i-boost ang ila signal sa Brgy. Nanga, Pototan, Iloilo sa diin madamo nga mga residente ang nagareklamo sa kakulang sang signal.
Ini ang hingyuon paagi sa resolution nga igapasar ni Board Member June Mondejar, chairman on public order and security.
Sa interview sang Bombo Radyo kay Mondejar, iya ginpahayag nga indi pa makabig nga ‘case closed’ ang kaso sa Nanga, Pototan samtang wala pa napasar ang kasubong nga resolution.
Nahibaluan nga ang reklamo ang ginpadangat ni Nanga, Pototan Punong Barangay Julie Sequio nga una na nagpahayag nga apektado ang ila communication line sang anom ka signal jamming device sa Iloilo District Jail (IDJ).
Kasunod diri, may mga ginpatigayon nga imbestigasyon kag joint inspection ang Committee on Public Order and Safety sang Sanguniang Panlalawigan, mga barangay official kag tiglawas sang National Telecommunication Commission (NTC) sa lugar sa diin natukiban sang ulihi nga wala sang kaangtanan ang signal jamming device sa pagkadula sang signal.
Pahayag ni Mondejar, pangabayon nila sa duha ka kompaniya nga pabaskugon ang signal kag i-implementar ang mga napasalig nga programa sa lugar.
Dugang pa sang natungdan, kabahin sang resolution nga igapasar ang magahingyo man sa Bureau of Jail Management and Penology (BJMP) sa pagpat-od nga indi madalahig ang signal sa lugar sa tion nga magdugang sila sang signal jamming devices sa IDJ.
