Apisar retired na sa poll body si anay Commissioner Rowena Guanzon, wala ini naghipos kasunod sang pagpa-guwa na sang Commission on Elections (COMELEC) – First Division sang desisyon kaangot sa consolidated disqualification cases nga gin-file batok kay presidential candidate Ferdinand ‘Bongbong’ Marcos, Jr.
Sa 41 ka pahina nga resolution nga ginsulat sang ponente nga si Commissioner Aimee Ferolino, gin-basura sang division ang mga kaso batok kay Marcos Jr. bangud sa “lack of merit.”
Ginhikayan naman ni Guanzon ang amo nga resolution.
“30 ka dias antes mapa-guwa ni Ferolino ang resolution, amo man lang ni gali ang isulat ya? Sa pagka-pigaw nga resolution! 30 dias gid ang ginhulat ya para maka-retire ako kag indi na maisip ang akon nga boto,” suno kay Guanzon.
Antes mag-retiro si Guanzon nagikan sa poll body sang Pebrero 2, nangin matunog pa ang drama sa COMELEC bangud sa iya mga ginpangbuyagyag.
Ginsapubliko sini nga nagboto siya agud nga i-disqualify si Marcos.
Sunod man sini nga gin-alegar nga hungod nga gin-delay ni Ferolino ang pagpa-guwa sang ruling bangud ginahulat nga maka-retiro siya agud nga indi maisip ang iya nga boto.
Ginpahayag pa ni Guanzon nga may isa ka senador nga amo ang nagahilabot sa boto ni Ferolino.
Tanan nga claims ni Guanzon ang ginpanginwala naman ni Ferolino. Sa sabat ni Ferolino, gin-alegar naman sini nga si Guanzon ang naga-attempt nga impluwensyahan ang iya nga boto.
Sa exclusive interview sang Bombo Radyo kay Guanzon, ginpahayag sini nga hayag-hayagan na nga graft ang ginhimo ni Ferolino.
“Klaro-klaro na gid ni ya nga graft ‘ni ya. Violation ini sang Anti-graft and Corrupt Practices Act Section 3-C — delaying a decision to favor a litigant,” pahayag ni Guanzon, Pebrero 11. Gin-criticize man sini ang rason sang first division kag ang pahayag sa resolution nga makadalagan si Marcos apisar nga na-convict ini sa 1990s tax case.
“Sa pagka-waay-waay! Sus kahikay ko! Wala kuno layi nga naga-penalty sang indi pag-file sang income tax returns. Ano pagkahimo sina kay na-convict na gani si Marcos sa regional trial court kag sa Court of Appeals? Ginbutangan siya gani multa… nga wala ya man ginbaydan asta subong. Oh te, kundi convict gid siya kag kriminal! Kriminal ni ya. Kriminal gid ni ya. Wala pa siya nagbayad multa. Puerte gid ka pigaw nga resolution. Saka gid ni sa Supreme Court,” suno kay Guanzon.
Una na nga ginpaghayag sang petitioners nga i-apelar nila sa Comelec en banc ang nangin ruling sang first division. ##
