Ginpasa na sang Public Safety and Transportation Management Office (PSTMO) sa Iloilo City Legal Office ang resolution sang Sangguniang Panlalawigan sa Iloilo nga nagahingyo sa Iloilo City government nga suspendiron ang implementasyon sang Local Public Transport Route Plan (LPTRP).
Sa interview sang Bombo Radyo kay Mr. Jeck Conlu, pinuno sang PSTMO, iya ginpahayag nga nagpangayo anay sila sang legal advice antes suspendiron ang implementasyon sang LPRTP.
Suno kay Conlu, nagpabutyag sang pagkabalaka ang mga transport cooperatives bangud nahatagan na sila sang franchise kag manug abot na ang mga modernized jeepney units nga ila nga ginbakal.
Dugang pa ni Conlu, kung suspendiron sang syudad ang implementasyon sang LPTRP, wala sang kuhaan sang inugbayad sa monthly ammortization ang mga kooperatiba.
Pahayag dugang ni Conlu nga ginbase lang sang syudad ang LPTRP sa guidelines sang Department of Transportation (DOTR).
Sa mga ruta nga sakop sang LPTRP, may mga taga-probinsya nga nag-apply sang franchise kag subong man, may mga myembro sang kooperatiba nga taga-probinsya man sang Iloilo.
