Patay ang isa responder sang Zarraga Municipal Disaster Risk Reduction and Management Office (MDRRMO) matapos ginluthang sang utod sang iya nga live-in partner sa Barangay Agusipan, Badiangan, Iloilo.
Ang biktima amo si Kim Richard Gerada, 32, residente sang Barangay Jalaud Norte, Zarraga, samtang ang suspek naman amo si Ricardo Prodigo III, 24, residente sang Barangay Agusipan, Badiangan.
Sa interview sang Bombo Radyo kay Pol. Lt. Ma. Rosario Miranda, hepe sang Badiangan Municipal Police Station, iya ginpahayag nga tatlo pa lang ka adlaw nga nag-abot ang biktima sa amo nga lugar agud nga didto temporaryo magpuyo kaupod ang iya nga live-in partner.
Indi pa matumod ang rason, apang sa inisyal nga pahayag sang pulis, nagahampang lang sang baraha ang biktima sang ginpalapitan sang suspek kag gintiro.
May pilas ang biktima sa iya nga liog kag kilid.
Na-recover man sa lugar ang apat ka empty shells sang .45 caliber.
Gilayon nga nagpalagyo ang suspek sakay sa motorsiklo, apang pila ka oras ang nagligad, nagsungka ini sa otoridad.
Gina-usisa pa subong kun ano gid ang motibo sa pagpatay sa biktima.
Suno naman kay Harold Clavejo, team leader sang MDRRMO responders, duha na ka tuig nga naga-trabaho si Gerada bilang driver-responder apang wala ini sang bisan isa nga nakontra, wala sang gamo, kag wala man sang bisyo.
