Ginlubong na ang Hollywood actor nga si Matthew Perry sa Los Angeles cemetery kasunod sang funeral service nga gintambungan sang iya mga himata kag castmates halin sa 1990s television sitcom nga “Friends.
Gindala si Perry, kilala nga Chandler Bing, sa Forest Lawn cemetery sa Hollywood Hills neighborhood sang Los Angeles nga malapit lamang sa Warner Brothers studio kun sa diin gin-film ang hit show.
PHOTO: CBS via Getty Images
Ini man ang katapusan nga palahuwayan sang pila ka Hollywood A-listers kaangay kanday Michael Jackson, Lucille Ball kag Elizabeth Taylor.
Sandig sa reports, yara sa lubong ang tanan niya nga “Friends” co-stars ni Perry– sanday Jennifer Aniston, Courteney Cox, Lisa Kudrow, Matt LeBlanc kag David Schwimmer.
Matandaan nga nangin popular ang Friends sang gin-ere ini sang 1994 tubtub 2004 kun sa diin ang final episode sini ang ginlantaw sang tubtub 52.5 million sa US nga amo ang na-rekord bilang most watched TV episode sang 2000s.
Sang nagligad naman nga semana sang gin-anunsyo nga napatay si Perry sa edad nga 54. Ginahibalo pa kun ano ang kinamatay sini kasunod sang pagkumpleto sang Los Angeles County Medical Examiner’s Office sang autopsy kag toxicology tests.
