ILOILO CITY – Gin-athag sang More Electric and Power Corporation nga wala sang problema sa mga power distribution utilities kasunod sang nagluntad nga regionwide brownout subong nga adlaw, Setyembre 24.
Sa interview sang Bombo Radyo kay Engr. Leomil “Bong” Tambanillo, Deputy Head sang Network Operations Department sang More Electric and Power Corporation, iya ginpahayag nga as of 7:00 pm, halos 84% na nga nabalik ang power supply sa syudad sang Iloilo kun sa diin ang Mandurriao feeder 3 kag 5 (commercial establishments) kag La Paz feeder 1 kag 3 (residential area) na lang ang nagapabilin nga offline.
Suno kay Engr. Tambanillo, under investigation sa gihapon sang National Grid Corporation of the Philippines kun ano gid ang rason sang nagluntad nga power interruption sa bug-os nga Rehiyon 6.
Ginpahayag ni Engr. Tambanillo nga nagadepende lang ang MORE Power sa available supply sang tagsa ka supplier agud nga may yara sang load nga idugang sa tagsa ka feeder.
Nauna na nga ginpahayag ni Michelle Visera, corporate communications officer kag public affairs officer for Western Visayas sang National Grid Corporation of the Philippines, nga may yara sang system disturbance nga nagluntad apang indi pa matumod kun bala ang deperensya ang yara sa mga planta nga naga-produce sang electric supply ukon sa NGCP mismo.
