ILOILO CITY – Laoman nga sa masunod nga semana mahibaluan na ang imbestigasyon tuhoy sa Angel A Resto Bar sa Smallville Complex, Mandurriao, Iloilo City may kaangtanan sa nadakpan nga duha ka mga menor de edad nga nagapanigarilyo sa guwa sang resto bar.
Sa interview sang Bombo Radyo kay Nestor Canong, pinuno sang Task Force on Moral and Values Formation, iya ginpahayag nga ginpanginwala sang tag-iya sang mismo tag-iya sang resto bar nga nag-inom ang duha ka mga menor de edad sa sulod sang Angel A.
Gani agud nga mapamatud-an, ginpangayo na sang Task Force on Moral and Values Formation ang Closed Circuit Television footage sang Angel A agud nga mahibaluan kun bala nag-inom ang mga menor de edad sa sulod sang resto bar.
Apang santu sa panaysayon sang duha ka mga menor de edad, ila gin-ako nga nag-inom sila sang makahulubog nga ilimnon sa sulod mismo sang resto bar.
Sa tion nga mapamatud-an nga naglapas ang resto bar sa pagsulundan sang Executive Order 46 ni Iloilo City Mayor Jerry Treñas, kuhaon ang mismo business permit sang resto bar kag ini ang siraduhan.
Sa subong, wala pa matigayon nga makahatag sang report ang mga inspection team kay Mayor Treñas apang napahibalo na ang alkalde tuhoy sa Angel A resto bar.
