Ipaguwa na subong nga adlaw, Enero 7, 2026, ang resulta sang 2025 bar examinations.
13,193 ang admitted applicants para sa bar exams, apang 11,425 ka examinees lamang ang nakakumpleto sa pagkuha sang test sadtong Septyembre 7, 10, kag 14.
Ini ang pinakamataas nga rekord sang nakatapos sang exam sa Philippine Bar history.
Na-highlight man sa 2025 Bar Examinations ang resilience sang mga Pilipino nga luyag mangin abogado. Sa numero sang examinees, lakip sa rekord amo ang 41 ka nagabusong, 206 ka senior citizens, 139 ka mga indibidwal nga may medical conditions, kag 241 ka persons with disabilities.
Ginpatigayon ang exams sa 14 local testing centers sa lain-lain nga bahin sang pungsod lakip na sa Central Philippine University (CPU) sa Iloilo City.
Suno sa Korte Suprema, maga-umpisa sa pagguwa ang pangalan sang bar passers 1:00 karon sa hapon. I-post man ang pangalan sang mga nakapasar sa LED walls sa Supreme Courtyard, kag sa website kag official social media accounts sang Korte Suprema.
Magasumpa ang bar passers kag magapirma sa Roll of Attorneys sa Pebrero 6. (Photo by Russell Palma)
