TIGBAUAN, ILOILO – Wala ginadula sang otoridad nga may yara sang foul play sa kamatayon sang grade 7 student nga ginapatihan naghikog sa Brgy. Cansilayan, Tigbauan, Iloilo.
Ini ang kasunod sang pahayag sang iloy nga mahimo may kaangtanan sa problema sa module ang rason sang paghikog sang 12 anyos nga biktima apang sa pihak sini, luyag naman sang amay nga ipaidalom sa autopsy examination ang bangkay agud mahibalu-an gid kun ano ang matuod nga natabo.
Sa interview sang Bombo Radyo kay Police Staff Sergeant Alfie Alcones, imbestigador sang Tigbauan Municipal Police Station, iya ginpahayag nga sa subong, tanan nga posibilidad ang ila nga ginakonsiderar.
Suno kay Alcones, kun basehan ang lugar kun sa diin natabo ang insidente, ang pamilya lamang sang biktima ang naga-agi sa kawayan nga taytay kun sa diin nakita malapit sa crime scene ang gingisi nga module.
Ginpahayag ni Alcones nga kun dumot ang posibilidad, wala naman sang may naka-away ang biktima santo sa pahayag sang pamilya.
Sa subong suno sa natungdan, ila anay hulaton ang resulta sang autopsy examination antes makapaguwa sang kumpirmasyon.
