Nagwa na ang autopsy result sang naluthangan-patay nga lalaki sang ginpatigayon sang mga pulis ang drug buy bust operation sa North Baluarte, Molo, Iloilo City
Ang biktima amo si Karl Dannielle Bolante, 27, kag residente sang nasambit nga lugar.
Samtang ang matuod nga subject sang operasyon amo si Dave Mendoza, 23, residente sang Rizal Pala-Pala 2, Iloilo City Proper.
Sa interview sang Bombo Radyo kay Police Major Marlyn Roquero, hepe sang Molo Police Station, iya ginpahayag nga ginpasa na nila ang autopsy result ni Bolante sa Regional Internal Affairs Service (RIAS) 6.
Suno kay Roquero, ginpahibalo naman nila ang pamilya sang biktima may kaangtanan sa resulta sang autopsy sang ila himata.
Pahayag ni Roquero, ginapreparar naman nila ang investigation report angot sa resulta sang autopsy.
Dugang pa sang pulis, hulaton nila ang desisyon sang pamilya Bolante kun magapasaka ang mga ini sang kaso.
Samtang, wala pa sa gihapon sang igtalupangod ang pamilya Bolante may kaangtanan sa resulta sang autopsy sang ila himata baliskad sa nangin pahayag sang Molo Police Station.
Sa interview sang Bombo Radyo kay Amalia Bolante, iloy sang biktima kag isa man ka Barangay Kagawad sa North Baluarte, Molo, Iloilo City, iya ginpahayag nga nagahingyo siya sa mga otoridad nga ipahibaluon man sila angot sa nangin resulta sang autopsy sang iya anak.
Suno sa iloy, kuntani makig-angot man sa ila ang mga pulis sa diin may ginhatag man siya nga numero sa Molo Police Station.
