ILOILO CITY – Igapasa na sang isa ka Chinese Construction Company sa bulan sang Oktubre kay Presidente Rodrigo Duterte ang resulta sang feasibility study tuhoy sa pagpatukod sang Iloilo-Guimaras-Negros bridge.
Sa interview sang Bombo Radyo kay Buenavista, Guimaras Mayor Eugene Reyes, iya ginpahayag nga may yara sang schedule nga ginasunod ang team nga nagapatigayon sang feasibility kag technical study agud nga maumpisahan na ang pagtukod sang taytay.
Suno kay Reyes, nakadepende kay Duterte ang mangin plastada sang pagtukod sang taytay nga maga-angot sa tatlo ka probinsya.
Sa subong suno kay Reyes, ginatun-an pa kun sa diin nga mga lugar maga-agi ang taytay agud nga indi man makatuga sang huol sa mga pumuluyo.
Samtang, tuhoy naman sa pagpasaka sang kaso sang Integrated Bar of the Philippines – Guimaras batok sa Maritime Industry
Auhtority kag Philippine Coast Guard, ginpahayag ni Reyes nga mahimo nga makatuga ini sang negatibo na epekto.
Suno kay Reyes, sa pinaka-ulihi nga pagsinapol nga ginpatawag sang Maritime Industry Authority, ginkasugtan sang tanan nga tumalambong nga magpaguwa sang moratorium tuhoy sa plano nga pag phase-out sa mga wooden hull nga pump boat.
Ini bangud nga suno kay Reyes, indi man nila luyag nga madulaan sang palangabuhi-an ang ginabanta 700 ka pamilya nga nagasalig sa kita sang pagbiyahe sang pumpboat.
Ang kaso nga declaratory relief, mandatory injunction kag prohibitory injunction nga ginpasaka batok sa mga nasambit nga ahensya sang gobyerno ang mahimo nga magtulod kay Department of Transportation Sec. Arthur Tugade nga ipatuman gilayon ang modernisasyon sa pump boat.
Nahibalu-an nga ang nasambit nga kaso ang may kaangtanan sa guidelines nga ginpaguwa sang Maritime Industry Authority tuhoy sa pagbiyahe sang mga pump boat nga may ruta Iloilo-Guimaras vice versa.
