SARA, ILOILO – Ipaguwa na sa katapusan nga adlaw sang Nobyembre ang resulta sang imbestigasyon tuhoy sa natabo nga pagluthang-patay sa isa ka lalaki sa ginapahayag checkpoint sa Brgy. Zerrudo, Sara, Iloilo.
Sa interview sang Bombo Radyo kay Atty. Samson Go, pinuno sang Legal Division sang Regional Internal Affairs Service 6, iya ginpahayag nga sang Nobyembre 25 ang deadline sa pagpasa sang position paper sa bahin sang 2nd Iloilo Provincial Mobile Force Company sa pagpamuno ni Police Lt. Col. Mario Baquiran kag ang pamilya sang biktima nga si Adonis Hontiveros Jr., 26, sang Brgy. Pinantan Elizalde, Ajuy, Iloilo.
Suno kay Atty. Go, ang position paper sang tatlo ka mga pulis nga sanday Police Corporal Alfredo Bartolo Jr., Police Corporal Jan Michael Parcia kag Patrolman Christopher Paclibar ang una na nga ginbaton pagkatapos sang duha ka clarificatory hearing sang Nobyembre 7 kag Nobyembre 13.
Ginpahayag ni Atty. Go nga pagkatapos nga mapaguwa sang Regional Internal Affairs Servivce ang resulta sang imbestigasyon, ini ang igapasa kay Police Regional Office 6 Director Police Brigadier General Rene Pamuspusan nga amo ang magadesisyon kun bala ini ang aprobahan ukon indi.
Tuhoy naman sa kusinero nga witness sang 2nd Iloilo Provincial Mobile Force Company, ginpahayag ni Atty. Go nga mas maayo kun ipaidalom ini sa background check magluwas sa clarificatory hearing nga kasubong lamang sa isa cross examination.
Kun madumduman, patay ang biktima nga si Adonis Hontiveros Jr., matapos ang ginapahayag pagpalagyo sa checkpoint kag una nga nagpalupok sang armas rason nga nagbalos man ang tatlo ka mga pulis.
Santo naman sa pahayag sang kaupod ni Hontiveros, wala sang may natabo nga checkpoint kag lunsay lamang himu-himo ang pahayag batok sa biktima.
