ILOILO CITY – Ginalauman nga mahibaluan na ang resulta subong nga semana ukon sa masunod nga semana ang resulta sang imbestigasyon nga ginpatigayon sa sunog nga nagluntad sa Zone 1, Brgy. Old Airport, Mandurriao, Iloilo sang tinalikdan nga Marso 11.
Sa interview sang Bombo Radyo kay Fire Chief Inspector Publio Ploteña, City Fire Marshall sang Iloilo City Fire Station, iya ginpahayag nga ginahulat pa ang resulta sang laboratory examination sa debris sa natabo nga sunog agud mahibaluan kun bala electrical in nature ang ginhalinan sang sunog.
Suno kay Ploteña, isa ka adlaw pagkatapos sang sunog, gilayon nga ginpadala ang debris sa Central Office sang Bureau of Fire Protection (BFP).
Indi pa man makahatag sang tul-id nga impormasyon ang tag-iya sang balay nga una nga nasunog kun ano ang ginhalinan sang sunog.
Nahibaluan nga naglab-ot sa 45 tanan ka panimalay ang naupos sang kalayo samtang 18 naman ang partially damaged.
