ILOILO CITY – Natalana nga ipagwa sang Commission on Elections (COMELEC) ang resulta sang ginapatigayon nga imbestigasyon kasunod sa postponement sang presidential kag vice presidential debates bangud sang kapaslawan sang private partner sang ahensya nga magbayad sa hotel.
Suno kay Commissioner Rey Bulay, 14 ka mga departamento sang COMELEC ang ginmanduan nga mag-file sang sabat sa ila nangin papel sa postponement sang debate.
Ang ini nga mga departamento ang ginalakipan sang Executive Director, Office of the Deputy Executive Director for Administration, Bids and Awards Committee, Office of the Deputy Director for Operations, kag Procurement Management Department.
Dugang pa ni Bulay, ang iban nga mga departamento ang nagsumite na sang ila sabat apisar nga wala sila sang papel sa transaksyon sa debate.
Tun-an pa ni Bulay ang nangin sabat sang 14 ka mga departamento kag kun magkooperar ang mga ini, i-release ang resulta sang imbestigasyon sa Byernes, April 29.
Ang presidential kag vice preidential debates ang natalana kuntani sang nagligad nga Abril 23 kag Abril 24.
Ini ang gin-postpone bangud nga wala nakabayad sang P14 million ang Impact Hub sa Sofitel Philippine Plaza Manila nga amo ang nag-host sang duha ka serye na sang debate.
Samtang, gin-hold sang COMELEC ang P15million nga payout para sa partner nga Impact Hub Manila bangud sang nagapadayon nga imbestigasyon.
Suno kay Commissioner Rey Bulay, wala siya nakahibalo kun ngaa nga gin-hold sang opisina ni chairman Saidamen Pangarungan ang amo nga payout.
Nahibaluan nga sanday Comelec directors James Jimenez kag Frances Arabe ang nagduso kay Pangarungan kag commissioner Socorro Inting nga mag-disburse sang P15 million nga gin-aprubahan man sang duha.
Apang suno kay Bulay, gin-hold ang disbursement antes pa man naggwa ang issue sang Impact Hub.
