ILOILO – Ginahulat nalang sang Local Government Unit sang Pavia ang resulta sang imbestigasyon sang third party consultant sa kontrobersyal nga P680-million Ungka flyover.
Nahibaluan nga una na nga nagpasalig ang Department of Public Works and Highways Region VI nga mapagwa na ang resulta sa katapusan sang Marso.
Sa interview sang Bombo Radyo kay Sangguniang Bayan Member Pyt Trimañez, iya ginpahayag nga nakaistoryahanay na sila ni Department of Public Works and Highways Region 6 Assistant Regional Director Jose Al Fruto natuhoy sa paghatag sang solusyon sa pila ka mga problema sang flyover.
Suno kay Trimañez, nalakip sa promisa nga solusyon ni Fruto amo ang pagpahamtang sang sidewalk agud maagyan sang mga pumuluyo kag pag-rehabilitate sang porsyon sang approach sang flyover.
Nagalaom naman ang opisyal nga mahatagan sang igtalupangod ang mga promisa nga ginbuy-an ni Engineer Fruto agud indi na magtuga sang huol sa publiko.
Samtang, ginpahayag dugang sang natungdan nga yara na sa kamot ni Department of Public Works and Highways Secretary Bonoan ang resulta sang imbestigasyon, apang wala pa sang natalana nga petsa kun san-o ini ipagwa.
