Wala na ginkakibot pa sang isa ka political analyst ang ginpasaka nga impeachment complaint sa Kamara batok kay Vice President Sara Duterte.
Sa interview sang Bombo Radyo kay Atty. Joenar Pueblo, President sang Philippine Arbitration Center in the Visayas, iya ginpahayag nga ang mga grounds for impeachment batok kay Vice President Sara amo ang culpable violations of the Constitution, graft and corruption, bribery, betrayal of public trust kag iban pa nga sahi sang krimen.
Ang basehan sang impeachment ang kaangot sa grave threat sang bise presidente sa kabuhi ni President Ferdinand Marcos, Jr. kag ang kuwestyonable nga paggasto sa iya confidential fund nga indi niya mapaathag.
Suno kay Pueblo, may duha ka proseso ang impeachment.
Una ang impeachment proper nga naga-umpisa sa Kamara sa diin magapungko nga daw kaangay sang piskal ang mga kongresista kag magadesisyon kun sufficient in form and substance ang gin-file nga impeachment complaint.
Kung pareho nga bastante sa form and substance, lantawon nila ang mga ebidensya kung may probable cause.
Kung may yara, ipasaka nila ini sa Senado.
Ang Senado naman ang magaserbe nga hukum kag magadesisyon kung dapat kakason ukon indi ang bise presidente.
Sa tion nga ang kaso ang napasaka na sa Senado, ang isa ka impeachable officer kaangay ni Duterte ang ma-impeach.
Apang sa subong, tuman naman pa ka temprano suno kay Pueblo agud pakton kung positibo ukon negatibo ang resulta sang nasambit nga tikang.
