BUENAVISTA, GUIMARAS – Ginkwestyon ni Buenavista, Guimaras Mayor Eugene Reyes ang nangin resulta sang joint investigation sang Philippine Coast Guard kag Maritime Industry Authority tuhoy sa natabo nga Iloilo Strait tragedy kun sa diin 31 ang patay.
Ini ang kasunod sang ginpaguwa nga 25 ka pahina nga resulta sang joint investigation sang duha ka ahensya tuhoy sa matuod nga natabo kag kun ano ang nangin problema sa rescue operations.
Sa interview sang Bombo Radyo kay Reyes, iya ginpahayag nga sa objectives sang joint investigation result, nakasaad nga wala na sang plano ang duha ka ahensya nga magtudlo-anay ukon magpangbasol sa kun sin-o ang may sala.
Ang nasambit nga objective ang ginkwestyon ni Reyes bangud para sa iya, may yara sang kakulangan sa rescue operation kag sa protocol sa pagbyahe sang mga pump boat.
Samtang, may kaangtanan naman sa pagtapna sang Novel Corovirus, ginpahayag sang alkalde nga sa Buenavista wharf, may yara sang duha ka linya para sa mga pasahero.
Ang isa ka linya suno kay Reyes ang para sa mga dumuluong nga nagakadapat nga makuhaan sang data agud nga mahibalu-an ang ila nga travel history samtang ang isa naman ka linya ang para sa mga tumandok sang Guimaras.
Bilang kabahin sang lihok sang Local Government Unit, activated naman ang mga Barangay Health Emergency Response Team para sa monitoring.
