ILOILO CITY- Halos wala sang nakit-an nga dako nga deperensya ang isa ka political analyst sa Leni Robredo vs Bong Bong Marcos rivalry sang 2016 kag subong nga 2022 elections.
Sa interview sang Bombo Radyo kay Professor Ramon Casiple, Executive Director sang Institute for Political and Electoral Reforms, iya ginpahayag nga indi malayo nga ang scenario nga apisar si Marcos ang nagapanguna sa surveys apang si Robredo ang magapangibabaw.
Suno kay Casiple, isa sa nakita niya nga problema sa kampo ni Marcos amo ang reachability sa mga botante ilabi na nga pila ka beses na ini nga nagapamalibad sa mga debate.
Pahayag ni Casiple, apisar madamo sang mga solid supporters si Marcos, ang iban nga botante nga undecided ang mahimo nga magsuporta kay Robredo ilabi na nga mas mabatian nila ang mga panindugan sang bise-presidente sa pila ka mga isyu nga indi naman nila mabatian kay Marcos.
Dugang pa ni Casiple, sa subong, madamo pa ang mahimo magbag-o kag ini ang magadepende naman sa mga lokal nga opisyales nga amo ang direkta nga may kapabilidad nga magkampanya para sa kandidatura sang mga presidentiables ilabi na sanday Marcos kag Robredo.
