ILOILO CITY – Mas ginpadasig ang paggwa sang resulta sang swab test ukon reverse transcription polymerase chain reaction (RT-PCR) test pinaagi sa Uswag molecular laboratory sa Molo, Iloilo City.
Sa exclusive interview sang Bombo Radyo kay Jeck Conlu, spokesperson sang COVID-19 Team sang Iloilo City Government, iya ginpahayag nga padayon ang operasyon sang nasambit nga laboratoryo.
Suno kay Conlu, wala sang backlog kag mas ginpadasig ang nasambit nga test sa diin sa sulod lang sang 24 tubtob 48 ka oras, mahimo nga maggwa na ang resulta.
Pahayag ni Conlu nga may yara sang maximum nga 400 ka tawo ang maakomodar sang molecular laboratory sa sulod sang isa ka adlaw.
Dugang pa sang natungdan, ginalauman man nga mas magadamo ang magapaidalum sa nasambit nga test bangud sa nagahilapit nga Paskwa.
Bangud sini, sa tion nga magsobra sa nasambit nga numero ang pumuluyo nga magpaswab, may bulig man humalin sa Western Visayas Medical Center-Sub-National Laboratory (WVMC-SNL) agud nga ma-akomodar ang tanan.
