ILOILO CITY – Ginahulat na lang ang resulta sang swab test sang mga ginadudahan nga naka-angkon sang close contact sa anum ka Coronavirus Disease 2019 (COVID-19) patients sa Brgy. Sto. Niño Sur, Arevalo, Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga madamo ang naka-angkon sang close contact sa mga COVID-19 patients nga rason sang pagpatigayon sang mass testing.
Suno kay Treñas, kumpirmado nga may yara sang local transmission sa nasambit nga lugar nga ginpaidalom sa Extreme Enhanced Community Quarantine.
Ginpahayag ni Treñas nga ginaprayoridad sa subong ang pagpadasig sang laboratory test agud nga mahibalu-an gilayon ang resulta.
May kaangtanan diri, nakighinun-anon na ang alkalde sa COVID-19 team agud nga mapatuman gilayon ang dugang nga preventive measures.
May kaangtanan naman sa reklamo sang mga pumuluyo tuhoy sa mahinay nga tagtaganay sang food assistance, ginpahayag ni Treñas nga si Executive Assistant Mark Ryan ‘Goygoy’ Acap na ang in-charge sa pagdul-ong sini sa nasambit nga barangay.
Ang food assistance ang iga turn-over sa barangay officials nga amo naman ang in-charge sa pagpanagtag sini sa mga pumuluyo.
Bangud nga madamo ang nagareklamo nga wala nakabaton sang pagkaon, ginpahayag sang alkalde nga iya hibaluon kun ano ang nangin problema.
