Ginakabig ni Retired Police Major Charlie Sustento nga kadalag-an ang pagboto sa iya sang malapit 80,000 ka mga pumuluyo sa 4th District of Iloilo.
Sa interview sang Bombo Radyo kay Sustento, iya ginpahayag nga apisar nga nalutos siya sa pagka-congressman ginakabig gihapon niya ini nga isa ka dako nga kadalag-an para sa kandidato nga kaangay niya nga wala man sang kwarta nga ginpanagtag sa tawo agod lamang nga magboto sa iya.
Suno pa kay Sustento, ini nagapkita lamang ang pagpalangga kag pagsalig sang mga Cuarto Distrito sa iya kag sa paglaum sang mga ini para sa bag-o nga istilo sang panghimanwa nga iya kuntani ginatanyag.
Bangud sini, nagpasalamat si Sustento sa mga nagsakdag sa iya kandidatura bisan pa nga liwat nga nangin madinalag-on ang iya kasumpong nga si incumbent 4th district Congressman Ferj Biron.
Apang, gin-athag man ni Sustento nga bisan pa nga may kwarta siya, indi man niya ini gihapon pag-usaron sa pagpamakal sang boto bangud ang amo nga buluhaton ang madugay naman niya nga ginapamatukan bilang isa ka police officer.
Dugang pa niya nga ang kadamuon sang boto nga iya nabaton, isa ka pamatuod nga amat-amat na nga nagabugtaw ang mga taga-Cuatro Distrito sa indi maayo nga pagdumala sa ila nga lugar.
