Ginkumpirma ni Retired Police Major Charlie Sustento nga magapapili ini bilang congressman sa Quarto Distrito sang Iloilo sa palaabuton nga 2025 elections.
Sa interview sang Bombo Radyo kay Sustento, iya ginpahayag nga nag-agi sa maid-id nga proseso ang pagkumpirma niya nga magpadalagan ini sa pagka-kongresista.
Suno kay Sustento, ang masami nga problema nga ginapangatubang sang pumuluyo ang nagtulod man sa iya agud nga magpa-eleher.
Ginpahayag man sini nga nakig-istorya man siya sa tagsa ka mga lideres sang banwa sa 4th District, kon sa diin, nakabaton man ini sang suporta naghalin sa ila.
Gintumod man sang natungdan nga halos kompleto naman ang ila nga linyada, apang indi pagid sini matumod kon sa diin siya nga Partido magalinyada.
Gin-athag man ni Sustento nga ini ang labing-una nga tion nga nagtingob ang oposisyon sa Quarto Distrito, kon sa diin, ginkakibot man niya ang iban sa mga nag-upod amo ang anay mga myembro sang kampo sang pamilya Biron.
Nagapati naman ini nga tion na agud nga manindugan ang pumuluyo bangud madugay na nga indi maatender sang lokal nga pamunuan sang Distrito ang mga problema nga ila ginapangatubang.
Posible naman nga makasumpong ni Sustento si Incumbent Iloilo 4th District Representative Ferj Biron kon magapapili ini liwat sa pagka-congressman.
