𝗗𝗨𝗠𝗔𝗡𝗚𝗔𝗦, 𝗜𝗟𝗢𝗜𝗟𝗢 — Ginkwestyon ni Ret. Police Major Charlie Belonio Sustento Jr. ang tagdumalahan sang Local Government Unit sang Dumangas, Iloilo kon sa diin nagkadto ang masobra P63 million nga pondo para sa Dumangas Port.
Sa interview sang Bombo Radyo kay Sustento, iya ginpahayag nga bilang tax payer, tuyo sini nga mahibaluan sang pumuluyo kon sa diin gingamit ang kwarta bangud nagapati ini nga kon may transparency wala sang corruption nga matabo.
Suno kay Sustento, sugod sang Abril 2022 tubtob subong, ang nasambit nga kantidad ang wala ma-turnover sa Philippine Ports Authority (PPA) bilang share.
Ginpahayag man sini nga sang ginpangita sang amo nga ahensya ang share, lunsay pagpamahog lamang ang ila nga nabaton halin sa local government unit sang Dumangas.
Dako man nga palaligban para sa natungdan ang nangin pahayag ni Dumangas, Iloilo Mayor Braeden John ‘BJ’ Biron nga indi makapaguwa sang kwarta kon wala sang pirma sa Memorandum of Agreement (MOA), rason man kon nga ginkwestyon sini kon sa diin ginbutang ang pondo samtang wala pa napaguwa.
Gin-athag man ni Sustento nga ang tinutuyo sang ginaduso niya nga tikang, amo agud nga mahatagan sang kasanag ang pomuluyo bangud dako ini nga kwarta nga dapat magamit man para sa mga pumuluyo.
Nahibaluan nga ang kabug-usan nga P63 million nga pondo, amo ang 35% share nga magakadto sa Philippine Ports Authority (PPA), samtang ang nabilin nga 65% share ang magakadto sa local government sang Dumangas.
