Naghingyo ang fishers’ groups sa Department of Agriculture (DA) nga magpatunga kag sabton ang isyu kaangot sa ginapahayag pagsaka sang retail price sang isda sang tubtub sa P40 kada kilo.
Suno sa Pambansang Lakas ng Kilusang Mamamalakaya ng Pilipinas, base sa ila monitoring, ang retail price sang tamudyos ang nagdangat na sa P260 per kilo ipaanggid sa presyo sini anay nga P180 tubtub sa P220.
Nakalab-ot naman ang tilapia sa P150 per kilo nga mataas man ipaanggid sa P100 to P120; samtang ang bangrus ang yara sa P240 per kilo halin sa P200.
Indi rasonable suno sa grupo ang pagsaka sa presyo sa sini nga mga isda.
Ginpahayag sini nga gina-control sang traders kag middlemen ang pag-presyo halin sa farmgate pakadto sa retail price.
Ginpanugyan man nga dapat direkta na nga magbakal ang gobyerno halin sa manugpangisda para masiguro nga ang isda ang mabaligya sa kasarangan nga presyo.
Dapat man suno sa grupo nga iduso gid ang pagpatuman sang price control sa idalom sang Republic Act 7581 ukon Automatic Price Control para ma-address ang manipulation kag profiteering.
