Bukas ang mga manufacturers kag ang retailers sa voluntary price freeze sa essential goods sa tunga sang ginapaabot nga posible pagsaka sa presyo bangud sang epekto sang El Niño phenomenon.
Ginpahayag ini sang Department of Trade and Industry (DTI) kasunod sang meeting sang manufacturers kag retailers kay Trade Secretary Alfredo Pascual.
Suno sa ahensya, nagapadayon pa ang diskusyon sa posible nga price freeze.
Sa idalom sang Price Act, ang presyo sang basic necessities ang insigida na nga “frozen” tubtub sa 60 ka adlaw kun ang area ang napaidalom sa state of calamity.
Ginpasalig man sang ahensya nga nagapadayon ini sa pag-monitor sa market conditions, ginaduso ang consumer rights, kag padayon nga ginagiyahan ang nasyon sa tunga sang sini nga mga pagpanghangkat.
Matandaan nga una na nga ginduso ni Senator Francis Tolentino ang pagdeklarar sang national state of calamity para nga ma-apply sa bilog nga pungsod ang nakabutang sa Price Act ukon ang pag-freeze sang presyo sang nagapanguna nga mga balaklon.
Nahibaluan nga base sa government data, ang tatlo sa pinakaapektado nga mga rehiyon bangud sa El Niño amo ang Mimaropa, ang Cordillera Administrative Region, kag ang Western Visayas.#
