SARA, ILOILO – Nagapati ang mayoralty candidate sang Sara, Iloilo nga pagpanghilabot ang ginahimo sang iya mga kasumpong sa pulitika sa iya nga grupo.
Ini bangud sa ginapahayag pagkandado sang mga barangay opisyal sa gym sang Brgy. Ardemil, Sara agud nga indi makahiwat sang caucus ang grupo ni Retired Army General Jon Aying.
Sa interview sang Bombo Radyo kay General Aying, iya ginpahayag nga may yara sila sang permit agud nga makapatigayon sila sang caucus sa nasambit nga barangay apang wala man ini gina-aktuhan sang mga opisyal sang Ardemil.
Suno kay Aying, apisar nga wala gin-aktuhan sang mga opisyales ang permit nga ila ginhatag, makonsidera na ini nga aprub matapos ang tatlo ka adlaw sang ila nga pagpasa.
Ginatudlo nga nagpadlock sang gym amo si Barangay Kagawad Evelyn Peñaflor.
Gintinguhaan man sang Bombo Radyo nga makuhaan sang pahayag si Peñaflor apang wala ini sa ila nga balay.
Nahibaluan nga si Peñaflor ang pakaisa ni anay alkalde sang Sara nga si Neptali Salcedo.
