Patay ang isa ka retired army kag pilason naman ang asawa sini matapos nagbunggo ang ginamaneho nga tricycle sa isa ka depampaseho nga jeepney sa Barangay 1 Poblacion, San Miguel, Iloilo.
Ang napatay nga soldado amo si Romeo Sioson, 52, kag pilason naman ang asawa sini nga si Liberty Sioson, 51, lunsay residente sang Barangay 14 Poblacion, San Miguel North sa amo nga banwa.
Samtang ang driver naman sang jeep amo si Kim Darwin Gemanga, 32, residente sang Barangay Agboy Sur, Leon, Iloilo.
Sa interview sang Bombo Radyo kay Police Staff Sergeant Ritchie Alcala, imbestigador sang San Miguel Municipal Police Station, iya ginpahayag nga nagaliko pawala ang traysikol nga ginamaneho ni Sioson sang gilayon nga nag-overtake ang jeepney nga ginamaneho ni Gemanga.
Bangud sa mabaskog nga impact sang pagbunggo-anay, nagtabog gid ang mag-asawa sa dalanon.
Patal nga pilas sa ulo ang naangkon ni Sioson nga amo ang gintunaan sang kamatayon sini.
Samtang, padayon naman nga ginabulong sa ospital ang asawa sang retired army.
Sa subong, yara na sa kustodiya sang San Miguel Municipal Police Station ang driver sang jeep.
