Madalagan liwat si Filipino boxing legend Senator Manny Pacquiao. Sini nga tion, indi sa patag sang pulitika kundi sa charity marathon event sa Japan.
Kahapon, Mayo 20, sang nag-abot si Pacquaio sa Tokyo kag mainit nga ginsugata kag gin-abi abi sang iya nga mga fans.
Patigayunon ang marathon event sa City Football Station sa Tochigi City Iwafune Sports Park buwas, Mayo 22.
Ang matipon nga pondo halin sa amo nga event ang gamiton agud magpatindog sang libre nga mga eskwelahan sa Pilipinas kag pagpatukod liwat sang mga imprastraktura nga ginguba sang Bagyo Odette.
Ang Manny Pacquiao Foundation charity marathon event amo ang isa sa una nga mga aktibidad ni Pacquiao matapos nga napierde ini sa May 2022 elections matapos nga nagpangatlo lang sa presidential race.
Ginalauman nga maga-perform sa event ang mga myembro sang all-female song kag dance group nga MNL48 kaupod ang ila “sisters” halin sa AKB48, isa man ka Japanese all-female group.
Lakip sa myembro sang MNL48 nga maga-perform sa marathon event amo sanday Amy, Coleen, Jan kag Sheki. ##
