ILOILO CITY – Emosyunal ang anay hepe sang Banate Municipal Police Station matapos nga no. 4 ang iya anak sa 2016 Bar Examinations.
Sa exclusive interview sang Bombo Radyo Iloilo kay retired Police Chief Inspector Allan Babayen-on sang Brgy. Belen, Banate, Iloilo, iya ginpahayag nga indi sini mapaathag ang iya nabatyagan matapos makapasar ang anak nga si Allana Mae Babayen-on sa pasinawan.
Suno sa anay pulis, naghingyo lang ini sa Diyos nga makapasar ang anak apang sobra-sobra pa ang ginhatag sa iya.
Ginpahayag sini nga siya gid ang nagtulod kay Allana Mae nga magkuha sang abogasya bangud nanugunan ini sa iya natun-an.
Luyag kuntani sang amay nga magsulod sa pagka-pulis ang iya anak apang nakit-an niya nga indi ini hilig sang iya bata.
Matapos sang iya pre-law sa West Visayas State University sa kurso nga Bachelor of Arts in Political Science, nagtrabaho anay si Atty. Babayen-on sa Manila kag sa ulihi natak-an na ini nga magtrabaho gani nagdesisyon nga magkuha sang Bachelor of Laws sa University of San Agustin sa diin nagtapos ini bilang Valedictorian.
Sa subong suno sa amay, ginaplanuhan na nila ang mangin selebrasyon sa tion nga maka-oathtaking ukon magsumpa na ang iya anak bilang bag-o nga abogado.