Ginbawian sang kabuhi ang isa ka retired police matapos ginapahayag naglain ang pamatyag matapos nakabaton sang first dose sang COVID-19 vaccine sa Jordan, Guimaras.
Residente sang Jordan, Guimaras ang retired pulis kag madugay nga gin-assign sa Sibunag Municipal Police Station.
Sa interview sang Bombo Radyo kay Police Major Bonifacio Aral, hepe sang Sibunag Municipal Police Station, iya ginpahayag nga santo sa ila nabaton nga impormasyon, ginhilanat ang retired police matapos nakabaton sang una niya nga dose sa COVID-19 vaccine.
Suno kay Aral, bangud sini, nagpa-admit sa isa ka ospital sa syudad sang Iloilo ang retired police sa diin ginpaidalom ini sa reverse transcription polymerase chain reaction (RT-PCR) test kag nagwa nga nagpositibo ini sa COVID-19.
Sang nagligad nga semana, ginbawian sang kabuhi ang anay police personnel.
Sa subong, gina-imbestigaran na sang Guimaras Provincial Health Office kun ano ang matuod nga gintunaan sang kamatayon sang retired pulis.
