Personal nga nagpadulong ang isa ka retired teacher sa Bombo Radyo Iloilo agud itu-ad nga ginpatay sini ang iya nga bana sa Ilawod Poblacion, Zarraga, Iloilo.
Ang biktima amo si Eduardo Nodque, 61-anyos, samtang ang asawa sini amo si Mary Joy Nodque, retired teacher, 59-anyos, residente sang nasambit nga lugar.
Sa interview sang Bombo Radyo kay Mary Joy Nodque, iya ginpahayag nga ginlamposan niya sang dumbbell ang iya nga asawa bangud sa may naghutik sa iya.
Gintuad man sini nga na-diagnose siya nga may bipolar disorder kag may depression, kon sa diin may gina-inom ini nga bulong.
Suno sa iya nga gin-alegar may naghutik sa iya, rason nga ginlampusan sini ang iya bana, kon sa diin, nag-agum ini sang pilas sa ulo.
Gilayon man nga nagsakay ang natungdan sa de-pampasahero nga jeep kag nagpadulong sa talatapan sang Bombo Radyo Iloilo.
Nagpakig-angot naman ang Bombo Radyo Iloilo sa Iloilo City Police Station 1 agud nga pormal nga ma-turn over sa kapulisan ang manunudlo.
Nagpasalig naman ang Iloilo City Police Station nga makig-angot sila sa Zarraga Municipal Police Station agud mahatagan sang nagakaigo kag legal nga solusyon ang amo nga panumbungon.
Nahibaluan nga ang bipolar disorder ang anay ginatawag nga manic depression, isa ka mental health condition ukon problema sa panghuna-huna nga nagatuga sang extreme mood swings.
