Nagapanindugan ang truck driver nga nakabunggo-patay sa isa ka senior citizen sa F. Parcon Street, Pototan, Iloilo nga aksidente ang natabo.
Ang truck driver amo si Eddie Condino, 37-anyos, kasado, kag residente sang Barangay San Roque, Dumalag, Capiz.
Samtang ang biktima naman amo si Liberty Perez, 66-anyos, retired teacher, kag residente sang Barangay Cau-ayan, Pototan, Iloilo.
Sa interview sang Bombo Radyo kay Police Lieutenant Adrian Baligod, Deputy Chief of Police sang Pototan Municipal Police Station, iya ginpahayag nga gintuad sang driver nga samtang nagamaneho ini nakabatyag siya nga may nalapakan sa likod nga porsyon sang ginamaneho nga truck.
Suno kay Baligod, ginpanaugan sang driver agud nga lantawon kag didto nakita niya ang lawas sang biktima nga nagahamyangon sa likod nga bahin sang truck.
Ginhambal man sang driver nga wala ini nagalaum nga may mga tawo nga nagatabok sa amo nga dalan bangud 50 metros pa ang kalayuon sang pedestrian lane halin sa kun diin natabo ang insidente.
Base sa imbestigasyon sang mga kapulisan, mabakal lang kuntani sang sud-an ang senior citizen para sa iya graduating nga apo.
Nagpakig-angot naman ang truck driver sa pamilya sang biktima.
Sa subong, yara na sa kustodiya sang kapulisan ang driver samtang ginahulat pa ang desisyon sang pamilya.
