Ginakalipay ni Rev. Fr. Angelo Colada ang pag-appoint ni Pope Francis kay His Excellency Most Rev. Midyphil B. Billones, bilang bag-o nga Archbishop sang Jaro.
Sa interview sang Bombo Radyo kay Colada, Director sang Social Communication, Archdiocese of Jaro, iya ginpahayag nga madamo na nga beses nga sila ang nakaupdanay ni Archbishop Billones lakip na sa gatherings, recollections, kag bisan sa panahon nga indi pa obispo si Father Billones.
Suno kay Colada, bisan papaano, ang ila nga ekspeyensya ang nakabulig man sa mga significant nga natabo sa kabuhi ni Archbishop Billones.
Ginpahayag man sini nga magabalik sa Cebu si Archbishop Billones agud i-settle ang mga nabilin niya nga responsibilidad.
Nahibaluan nga si Archbishop Billones ang nagserbe man nga Auxiliary Bishop sang Cebu.
Si Billones nga naga-edad 55-anyos amo na ang mangin ika-14 nga archbishop sang Jaro nga nagasakop sa syudad kag probinsya sang Iloilo amo man sa probinsya sang Guimaras.
Nabun-ag siya sa Panay, Capiz.
Nagtuon siya sang Philosophy sa St. Vincent Ferrer Seminary sa Iloilo City kag Theology sa Loyola School of Theology sa Quezon City kun sa diin nakuha sini ang master’s degree sa amo man nga program.
Na-ordenahan siya bilang pari sa Archdiocese of Jaro sang Oktubre 2, 1995 ukon halos tatlo ka dekada na ang nagligad.
Si Arsobispo Billones amo ang magabulos kay retired Archbishop Most Reverend Jose Romeo O. Lazo, D.D.
