Nagtaas sang 1.4 percent ang revenue ukon kita sang business process outsourcing (BPO) sang 2020 sa pihak sang COVID-19 pandemic.
Suno kay Rey Untal, Presidente kag Chief Executive Officer sang IT and Business Process Association of the Philippines, nagdangat sa $26.7 billion ukon P1.2 trillion ang kabug-usan nga kita sang ila industriya humalin sang nagpatuman sila sang flexible work arrangements agud masigurado ang padayon nga operasyon sa tunga sang pandemya
Samtang, nagdangat naman sa 1.8 percent ang dugang nga ginhire sang mga BPO companies sang 2020 ukon may kabug-usan nga 1.32 million direct employment sa Pilipinas.
“Noong tiningnan po namin ang statistics noong 2020, nakakagulat po at kami po ay lumaki pa rin kahit hindi ganoong kalakihan ang aming pag-grow. I think from a headcount standpoint, lumago po kami ng 1.8 percent and another 1.4 percent po sa revenue,” pahayag ni Untal.
Ginpasalamatan man ni Untal ang gobyerno sa pagkilala sa mga BPO employees bilang essential workers, sa diin ginpasugtan sila nga magtrabaho apisar may pandemya.
Sa subong, ginahandaan na sang BPO companies ang vaccination sang ila mga empleyado gamit ang 1 million doses sang vaccines nga ginbakal pinaagi sa tripartite agreement kaupod ang national government kag vaccine manufacturers.
Subong nga tuig, ginapanan-aw ni Untal nga magtaas pa sa 5 tubtub 6.5 percent ang kita sang mga BPO companies.
“So mukhang ang sentimyento ng mga negosyante, at country heads ay positibo ayon sa paglaki ng industriya ngayong 2021.”
