Personal nga ginbaton sang indibidwal nga naghatag sang impormasyon batok kay Jerry Lima nga suspek sa pagpatay sa isa ka senior citizen sa Ledesco Village, Barangay Tabuc Suba, La Paz sang Mayo 24 ang reward money nga halin sa Iloilo City Government.
Sa matandaan nga may ara sang patong ukon reward nga kabug-usan nga P550,000 ang makatudlo kay Lima kun sa diin P500,000 magahalin sa pamilya sang biktima, samtang P50,000 ang halin sa City Government.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginpahayag nga dako nga bulig ini para sa pamilya sang biktima nga mahatagan sang hustisya ang ila nga iloy.
Madumduman nga naaresto sang Domingo nga adlaw ang suspek matapos ang entrapment operation sang Iloilo City Police Office sa Oton Public Plaza.
Gindayaw naman ni Mayor Raisa Treñas ang Iloilo City Police Office upod sa mga law enforcement agencies nga bangud sa ila dedikasyon kag commitment natigayon nga madakop ang nasambit nga suspek.
