ILOILO CITY- Nagtanyag sang dugang nga reward money ang pamilya sang ginpatay nga founder sang Psi Sigma Phi Philippines Incorporated sa sin-o man nga makatudlo sa responsable sa brutal nga pagpatay sa iya.
Ang biktima amo si Vivencio Bennedick Dequilla Jr., 63, nga nasapwan sa katubuhan sa Brgy. PD Monfort North, kag yara na sa advanced state of
decomposition sang Marso 2021.
Sa interview sang Bombo Radyo kay Zaldy Dequilla, utod sang biktima, iya ginpahayag nga dismayado siya sa mahinay nga development sa kaso bangud tubtob subong, wala sa gihapon sang natumod nga suspek sa pagpatay sa biktima.
Suno kay Dequilla, gikan sa P100,000, ginhimo nila nga P250,000 ang reward money agud nga mapadasig na ang pagsolbar sang kaso.
Sa interview naman sang Bombo Radyo kay PMajor Joegen Suegay, hepe sang Dumangas Municipal Police Station, iya ginpahayag nga ginapasalig na nila nga hatagan sang nagakaigo nga proteksyon kag seguridad ang sin-o man nga magtindog testigo kag makatudlo sa posible suspek sa krimen.
