Iloilo City – Ginpaidalom na sa verification kag validation ang identity sang suspek sa pagpatay sa massage therapist sa Queens Court Inn, Barangay Bolilao, Mandurriao, Iloilo City.
Ang biktima amo si Christine Gabayeron, 38, temporaryo nga nagatinir sa syudad sang Iloilo apang residente sang Barangay Bacjawan Sur, Concepcion, Iloilo.
Sa interview sang Bombo Radyo kay Pol. Lt. Joebert Amado, deputy station commander sang Mandurriao Police Station, iya ginpahayag nga nakasuksok sang sando, shorts kag tsinelas ang suspek.
Suno kay Amado, may gina-uyatan na ini nga footage sang closed-circuit television, apang indi pa pwede nga mapagwa sa publiko.
Kaangot diri suno sang natungdan, base sa initial autopsy result, may yara sang patal nga pilas sa ulo ang biktima bangud sa paglampos sang suspek sang botelya sang makahulubog nga ilimnon.
Wala naman sang defense wound nga nakit-an sa biktima.
Sa subong, nagtanyag ang Iloilo City Police Office pinaagi kay Mandurriao Police Station officer-in-charge Police Lieutenant Colonel Albert Sy sang reward money nga nagdangat sa P10,000 sa makatudlo sa suspek.
Ginakabig na sa karon ang suspek bilang ‘armed kag dangerous’ bangud man sa pagpatay kay Gabayeron.
