ILOILO CITY – Ginbuyagyag ni Agriculture Secretary Emmanuel “Manny” Pinol nga naga-lobby sa iya ang ginakabig nga reyna sang cartel sang ahos nga si Lilia Matabang alyas Leah Cruz.
Sa interview sang Bombo Radyo Iloilo, ginpahayag sang tiglikom nga ang brodkaster nga si Ramon Tulfo ang nagaserbe nga palaagyan ni Matabang agud makapalapit sa iya.
Suno kay Pinol, ginahingyo ni Tulfo nga istoryahon niya si Matabang.
Apang ginpamatukan ini ni Secretary Pinol.
Suno sa tiglikom, wala sang maayo nga bunga kun magpakigsapol ini kay Matabang.
Kadungan sini ginpaandaman sang DA chief ang mga importers sang ahos kag sibuyas nga indi siya paghangkaton.
Apang gin-ako sang tiglikom nga bisan ano nga kontrol sa cartel kun kulang ang produksyon sang pungsod, mahimo gihapon manipulahon ang presyo, rason nga pasanyugon sang Department of Agriculture ang produksyon sang sibuyas kag ahos sa pungsod.