Nagapatigayon na sang motu proprio investigation ukon kaugalingon nga imbestigasyon ang Regional Internal Affairs Service (RIAS) 6 may kaangtanan sa kontrobersyal nga pagkaluthang-patay sa nasal-an nga subject sa ginpatigayon nga buybust operation sa Barangay North Baluarte, Molo, Iloilo City.
Ang biktima amo si Karl Daniel Bolante, 27, residente sang North Baluarte Molo, Iloilo City kag ang matuod nga subject amo si Dave Mendoza, 23 anyos sang Rizal Pala-Pala 2, Iloilo City Proper.
Ginhingagaw pa dala sa ospital si Bolante apang bangud sa patal nga pilas sa dughan, ginbawian ini sang kabuhi.
Natigayon naman nga ma-aresto ang subject nga si Mendoza.
Sa exclusive interview sang Bombo Radyo kay Pol. Col. Roger James Brillantes, director sang Regional Internal Affairs Service (RIAS) 6, iya ginpahayag nga may gintipon na sila nga mga dokumento nga mangin basehan sang ila kaugalingon nga imbestigasyon.
Suno kay Brillantes, ipaidalom man sa paraffin test ang subject sang drug buy bust nga si Mendoza.
Dugang pa sang natungdan, imbestigaran man nila ang tanan nga operatiba nga nagpatigayon sang drug buy bust operation.
Samtang, ginapahayag nga napreso na sadto ang biktima nga si Bolante.
Sa interview sang Bombo Radyo kay Police Capt. Shella Mae Sangrines, hepe sang Iloilo Police Station 1, iya ginpahayag nga may mga impormasyon sila nga nabaton may kaangtanan sa background ni Bolante apang subject pa gihapon for validation.
Suno kay Sangrines, sa subong, nagapadayon pa ang ila nga imbestigasyon sa diin may yara na sila sang mga naplastar nga sirkumstansya kag natipon nga mga dokumento.
Pahayag sang pulis, ang tanan naman nga recoveries sa natabo nga buy bust ang dal-on na nila sa Regional Crime Laboratory.
Nahibaluan nga narekober sa buy bust operation ang M26 hand grenade kag 38 caliber nga pusil.
Nakuha naman sa possession ni Mendoza ang tatlo ka sachets sang suspected shabu kag P2,000 nga buy bust money.
