ILOILO CITY – Nagpaathag ang Regional Internal Affairs Service (RIAS) sang Police Regional Office (PRO) 6 kun nga-a wala sila nagahatag sang update tuhoy sa Moto Propio Investigation sa natabo nga pagmaoy sang 3 ka pulis sa isa ka disco bar and restaurant sa syudad sang Iloilo.
Sa interview sang Bombo Radyo kay Atty. Samson Go, pinuno sang Legal Affairs Division sang RIAS, iya ginpahayag nga indi mahimo nga ibuyagyag sang RIAS ang natuhoy sa imbestigasyon bangud nga makabig nga confidential ang mga impormasyon.
Ang RIAS suno kay Atty. Go ang nagapatigayon lamang sang imbestigasyon samtang ang disciplinary authority amo ang Regional Director.
Sa pagpaathag ni Atty. Go, ang katungdanan sang RIAS amo ang paghimu sang rekomendasyon nga igahatag sa Committee on Disposition of Administrative Cases (CDAC).
Ang CDAC amo ang magapatigayon sang deliberasyon sa kaso kag ang resulta ang ihatag sa Regional Director.
Sa subong suno sa natungdan, ila nga ginaduso sa Senado nga hatagan sang disciplinary auhtority ang RIAS agud nga sila na mismo ang makadesisyon sa mga kaso nga ginakaulamiran sang mga pulis.
