Temporaryo nga ginsuspinde ang pag-abot sang mga locally stranded individuals (LSIs) sa syudad sang Iloilo umpisa subong nga adlaw, Oktubre 3 tubtob Oktubre 9.
Sa interview sang Bombo Radyo kay Iloilo City Mayor Jerry Treñas, iya ginpahayag nga iya ginhingyo sa Regional Inter-Agency Task Force nga i-require ang negative RT-PCR test results sa mga LSIs ‘within 72 hours’ antes sang petsa sang ila byahe.
Apang sang ini ang gindangop sa Regional Inter-Agency Task Force, ginrefer man ini sa National Inter-Agency Task Force bangud ginapahayag nga tuhay ini nga protocol gani kinahanglan ang approval sang national government.
Magluwas diri, ginalikawan man ang pagginutok sa quarantine facilities sa syudad.
Bangud sini, naghingyo ang alkalde nga samtang wala pa ang approval sang National Inter-Agency Task Force sa negative RT-PCR test results nga protocol, suspended anay ang pagbaton sa mga LSIs.
Ini ang gin-aprubahan man sang Regional Inter-Agency Task Force kag Regional Task Force for COVID-19 paagi sa pagpagwa sang Resolution No. 45 Series of 2020 nga napetsahan Oktubre 2.
