ILOILO CITY- Ginkumpirma ni Iloilo 1st District Representative Janette Garin nga magapadalagan sa pagka- Board Member ang iya anak nga si Rica Jane Garin.
Sa interview sang Bombo Radyo kay Rep. Garin, iya ginpahayag nga magabulos ang iya anak kay Board Member Valentin Serag nga matapos na ang termino kag posible nga magpadalagan sa pagka-alkalde sang San Joaquin.
Suno kay Garin, ara man sa ila linyada nga magapa-reelect si Board Member Jo Ann Germinanda.
Ginpahayag ni Garin nga sa subong, padayon pa ang ila nga pagplastar sa lokal nga pulitika sa mga banwa, kag sa tion nga matapos na, ila sunod nga istoryahan kun sin-o ang ila padalaganon sa pagka-bise gobernador.
Gin-athag naman sang kongresista nga tanan sila ang committed sa ila suporta kay Governor Defensor.
Pahayag pa niya, ini bangud nga intensyon sang administrasyon amo nga hugpongon ang mga lideres sa Iloilo.
