Ginklaro sang opisyal sang Department of Agriculture (DA) nga ang deklarasyon sang rice emergency nga natalana subong nga semana ang para lamang sa mga lugar nga may nagapanglakaak nga presyo sa bugas.
Suno kay Agriculture Assistant Secretary Arnel de Mesa, base sa nakasaad sa layi, magapatunga lamang ang ahensya kag ang National Food Authority (NFA) sa areas nga may extraordinary increase ukon indi kinaandan nga pagsaka sa presyo, apang kun manubo man ang presyuhanay, indi na ini kinahanglan i-check.
Ang ginatumod sini nga layi amo ang Republic Act (RA) 12078 nga nagaamyendar sang Rice Tariffication Law.
Ini nga layi ang nagahatag sang otoridad sa tiglikom sang DA nga magdeklarar sang food security emergencies sa areas nga may kakulangan sang food supply ukon may extraordinary price increase nga naobserbahan.
Una naman nga ginkumpirma ni DA Secretary Francisco Tiu Laurel Jr. nga nabaton na sini ang pormal nga resolution sang National Price Coordinating Council (NPCC) kaangot sa ila nga rekomendasyon, kag ginalauman nga Martes sini ideklarar ang food security emergency.
Sa subong, ginahitso pa sang ahensya ang desisyon sa deklarasyon kun ano nga mga lugar ang maapektuhan.
Ginpasalig sini nga ang una nga lantawon amo ang key cities kag metropolitan areas.
Sa idalom sang rice emergency declaration, ang bugas nga stock sang National Food Authority (NFA) amo ang igabaligya sa government agencies kag local government units sa presyo nga P36 per kilogram kag sa consumers sa presyo naman nga P38 per kilogram.
