Nagpa-Bombo si Punong Barangay Judy Navales sang Rizal Pala Pala II, City Proper kag nagpabutyag sang kalain sa buot bangud nga ginapahayag wala nagaagi sa iya ang bulig halin sa Iloilo City Government.
Ini ang kaangot sa Bigay Bigas sa Masa Rice Program sang City Government kun sa diin ginatuyo nga mahatagan sang rice assistance ang mga imol nga pamilya, mga senior citizens, persons with disability (PWD), solo parents, mga mangunguma kag iba pa nga nalakip sa vulnerable sectors.
Sa interview sang Bombo Radyo kay Navales, iya ginpahayag nga nakibot lamang ini nga nadul-ong na ang bugas sa ila barangay kag ginderitso panagtag sa mga pumuluyo.
Suno kay Navales, wala gid sang koordinasyon sa iya ukon bisan pahibalo lang.
Gina-alegar nga sa anay punong barangay nagaagi ang tagtaganay sang bugas kun sa diin bisan ang listahan sang mga beneficiaries wala gid nakita ni Navales.
Pahayag niya, madamo sang mga pumuluyo ang naga-reklamo sa iya kun ngaa wala ang mga ini nakabatun sang bugas apang ang iban nagasululobra ang nakuha.
Ginapahayag man nga ginapili lang ang mga ginahatagan sang bugas.
Ginpabutyag ni Navales, kun gusto sang iban nga residente nga sa ila lang makadto ang bugas halin sa City Government, wala gid ini sang kaso sa iya apang kuntani ipahibalo lang sa iya bilang opisyal sang barangay.
Dugang pa ni Navales, iya ginapangabay ang gamay nga pagrespeto sa iya bilang punong barangay bangud gusto man sini siguraduhon nga ang pagdumala sa ila lugar ang wala sang pinilian kag palalatas ang tanan.#
(Text/Report: Bombo Krylle Melliza)
