Ginatudlo ni House Committee on Public Accounts Chairperson Terry Ridon bilang “double hearsay” ang mga alegasyon nga may record sang komunikasyon sa tunga ni President Ferdinand Marcos Jr. kag anay Undersecretary Adrian Bersamin nga nagapakita sang ila direkta nga koneksyon sang Presidente sa mga kickback sa flood control.
Si Adrian Bersamin amo ang apo ni former executive secretary Lucas Bersamin, kag amo ini ang ginatumod ni former Congressman Zaldy Co nga nagkumpirma sa iya nga nagmandu si President Marcos sang insertion sang P100 billion sa 2025 national budget.
Suno kay Ridon, magluwas lamang kun personal nga kumpirmahon ni Bersamin ang kamatuoran sa ginaalegar nga komunikasyon nila ni Marcos, ang ini nga mga alegasyon wala sa gihapon sang balor kag indi magdugay sa korte ukon sa proseso sang impeachment.
Samtang, suno naman kay ACT Teachers Party List Representative Antonio Tinio pwede nga gamiton ang record sang komunikasyon ni Marcos kag Bersamin bilang basehan sang isa pa ka posible nga impeachment complaint batok sa Presidente kun natapos na ang one-year ban sini sa Enero 2027.
Ginpahayag naman ni House Assistant Majority Leader Zia Alonto Adiong nga kun may ara sang nagakaigo nga ebidensya para suportahan ang mga pahayag sini, dapat mapakita sa deliberasyon sang house panel sa mga impeachment complaint batok sa Presidente.
Nahibaluan nga ginpanginwala sang Malacañang ang nasambit nga komunikasyon kag nagpahayag nga ang Presidente wala sang koneksyon sa anuman nga korapsyon nga nagakatabo sa gobyerno.
