Kun wala ka pa naka-get over sa Super Bowl performance ni Rihanna, there’s more! Maga-perform ang pop superstar sa Oscars ukon ang top awards show sa film industry sa Hollywood sa masunod nga bulan!
Suno sa organizers, i-perform sang Barbados-born singer ang iya Academy Award-nominated song nga “Lift Me Up” nga halin sa “Black Panther: Wakanda Forever”.
Matandaan nga sa sulod sang pito ka tuig, wala naka-perform ang 35 anyos nga singer sa live show antes ang iya performance sa Super Bowl subong nga Pebrero.
Sang tion nga wala siya sa live shows, nagtutok si Rihanna sa makeup, lingerie kag high-fashion brands nga naghimo sa iya nga isa ka billionaire. Nagtutok man siya sa pagpadaku sa iya anak.
Sa Super Bowl performance, nakumpirma man nga nagabusong si Rihanna sa iya ikaduha nga anak.
Ang “Lift Me Up” amo ang first Oscar nomination para kay Rihanna, apang antes sini, nakahimo siya sang rekord bilang nine-time Grammy winner nga may walo ka multi-platinum albums.
Patigayunon ang 95th Academy Awards sa Dolby Theatre sa Los Angeles sa Marso 12. ##
