Nakahibalo ka bala kun ano ang matabo pananglitan kaslon ang agot nga anak sang pinaka-manggaranon nga tawo sa Asya?
Indi na pag-problemahi ang sabat bangud ginhimo na ina sang Indian billionaire industrialist nga si Mukesh Ambani sang naghiwat ini sang tatlo ka adlaw nga prenuptial bash apat ka bulan antes ang aktwal nga seremonya sa kasal sang bata sini nga si Anant Ambani, 28, kag sang iya longtime girlfriend nga si Radhika Merchant, 29.
Indi basta-basta ang gintipon nga mga personalidad sa ila syudad sa Jamnagar kundi mga tycoons halin sa bilog nga kalibutan, heads of state, kag Hollywood kag Bollywood stars sang nag-umpisa na ang prenuptial bash.
Lakip sa masobra 1,000 nga nakabutang sa guest list amo sanday pop superstar Rihanna, Microsoft co-founder kag philanthropist nga si Bill Gates, Meta boss nga si Mark Zuckerberg, anak ni anay US President Donald Trump nga si Ivanka Trump, kag Bollywood celebrity Shah Rukh Khan.
Hulyo 29 pa ang kasal sang duha, apang sandig sa reports, ginbayaran na si Rihanna sang P354.6-million agud lamang nga maka-perform sa amo nga pagtilipon.
Nahibaluan nga ang amay nga si Ambani, 66, amo ang ika-10 sa pinaka-manggaranon nga tawo sa bilog nga kalibutan kag may net worth nga P6.4-trillion.
Sa bilog nga Asya, siya ang ginakabig nga pinakamanggaranon.
Indi na ini bag-o nga mga selebrasyon sa ila pamilya bangud sang 2018, sang ginkasal man ang anak sini nga babayi, nalakip man sa enggrande nga selebrasyon ang pop sensation nga si Beyoncé kag yara man ang former US Secretaries of State nga sanday Hillary Clinton kag John Kerry. #
