Ipakigbato ni opposition Senator Risa Hontiveros nga indi na pagpasakaan ang 2025 budget sang Office of the Vice President (OVP).
Suno sa senadora, bastante na ang P733.1 million para sa opisina ni Vice President Sara Duterte bangud naka-operate man ang anay ang nagligad nga mga bise-presidente nga amo lang sini ang ila pondo.
“I think sapat na yung level ng proposed budget ng OVP. Nakapag-operate na nga ang ibang mga OVPs in previous administrations sa ganyang level lang,” pahayag sang senadora.
Nahibaluan nga P2.03-billion ang original budget proposal sang Malacañang para sa OVP budget apang ginbuhinan sang yara na sa Kamara.
Ang House version ang gin-adoptar sang Senate finance committee, apang ini nga kantidad ang pwede pa gihapon ma-islan sa period of amendments sa plenaryo.
May mga kaalyado si Duterte sa Senado nga nagaduso nga ibalik ang gin-cut nga P1.3 billion sa OVP.
Apang pahayag naman ni Hontiveros, wala man gani P1-billion ang budget sang predecessors ni Sara nga sanday former vice presidents Leni Robredo kag Jejomar Binay.
“As of today, I would vote against adding to the OVP budget for the reasons I stated. Unless meron talagang super, super, super duper good reason na makumbinsi pa naman ako,” dugang ni Hontiveros.
Wala man sang problema ang senadora sa tikang sang Kamara nga i-realign ang P600-million sa OVP social services sa iban nga relevant agencies, bangud nga makapili man gihapon ang OVP sang mga benepisyaryo bisan nga wala ini sang gina-uyatan nga pondo.
Una na nga nagpaandam si Duterte nga may 200 ka mga empleyado nga potensyal nga mawad-an sang trabaho bangud sa P1.3-billion pesos nga budget cut, apang nagsabat si Hontiveros nga ang ma-displace nga government workers ang mahimo man ma-absorb sang iban nga opisina ukon ahensya.
Sa iya latest press conference, ginsiling ni Sara nga ginatugyan na lang niya sa Kamara kag Senado kun pila nga budget ang ihatag sa iya.#
